Diware

Tuti khidki ke jale gatto se dhak kar ke,
Aaj maine apne ghar me aane wali hawa bhi rok di hai
Is chaardiwari me us duniya ka khayaal bhi na aaye
Isliye diware chhat se jada zaruri hai…

Is diwar ke us taraf ke log alag hai
Unki galti hai ki mere ghar ki chhat tuti hai
Int patthar ke saude kiye maine diwaro ke liye
Kyoki diware chhat se jada zaruri hai

Ab is hawa me mera hissa do,
Kyoki jo hawa unke galiyare se aati hai,
Usme main saans nahi le sakta.
Mere ghar pe patthar phenka tha usne…
Isliye diware chhat se jada zaruri hai.

Kaun kehta hai muhafiz hai wo mere bolo,
Mujhpe ahsaan kar ke aaj gunah dhone aaye?
Unko keh do ki yaha mafi nahi, sirf nafrat milegi…
Meri ranjish mujhe teri hansi se pyaari hai.

Ye ranjish kahi unki bato se na dhul jaye
Isliye diware chhat se jada zaruri hai.


(dedicate to all of us who are so fond of dividing that we forget, God never created divisions, just differences, which can be reduced, or magnified... depending on one's wish)